Wu ich gebore benn, wu ich lääb

Rilze in de Südpfalz, noh am Rhei',
am "Deutschen Strome” esch ma' glei'.
Neustadt, Karlsruh' - egal wu naa,
Landau, Speyer - schnell bescht daa!

Üwerall esch der Ort bekannt,
in de Palz un im Bad'ner Land.
Zentral geläsche zwische Rhein un Haardt,
d'Mensche mit offener Pälzer Art.

Lääwe duht ma' in Rilze ach recht gut,
weil ma' beim "Daimler” schaffe duht.
Des zeischt ma' uff de Schtrooß ach gern,
fahrt Audo's, wu vornedruff änn Schtern.

Zeitvertreib gäbt's fer jeden G'schmack
in Kultur un Schport esch ma' schwer uff zack.
Vereine, ball volle fuchzisch an de Zahl,
fer d'Freizeitg'schtaltung ideal.

Heimat fer veel wu zugezoche,
wu d'Vorzüüsch vun Rilze hänn geroche!
Fer ä Haisel baue sinn die sofort willisch,
weil d'Bauplätz do holt ach noch "billisch”!

Einmalig Rilze weit un breit doschteht,
wann's um's Feschtle feiere geht.
Äganzes "Freizeitdörfel” schteht devor bereit,
im ganze Land ä Besonderheit.

Ideal fer alle, fer jung und alt
fer jeden gäbt's do ebbes halt.
Fahrradfahre, wannere, tschogge,
ach de Campingplatz duht manchen locke.
Drum gilt es ach fer besonders schick,
uff Rilze se heirate: Was ä Glick!

Moby Dick nitt zu vergesse -
ä Allwetterbad mit Raffinesse.
"Freizeithaus” un "Schtreichelzoo”,
do weeren alle Besucher froh.

Die Versle zu lääse un zu schtudiere,
hääßt "R Ü L Z H E I M” lerne buchschtabiere.
Dann wissen ehr, warum ich Rilzemer bleib:
"Rilze: Üwerall Lääwe, Zeitvertreib!
Heimat: Einmalig! Ideal: Moby Dick!”
Rilze, mei Lääwe un mei Geschick!

Gedicht von Kurt Kupper